हुम्ला । हुम्लाको नाम्खा गाउँपालिका–६ स्थित तुलिङमा हिम पाइप निर्माण गरेपछि यातायातका साधनलाई सहज भएको छ । जिल्लाको लिमि लाप्चादेखि मानसरोवर दर्शनका लागि सोही बाटो हुँदै जाने गर्दछ ।
पर्यटकीय क्षेत्रका रुपमा रहेको लिमिको लाप्चा पुगेर देश विदेशका पर्यटकहरू मानसरोवर दर्शन गर्ने गर्दछन् । यहाँ नत सन्चारको पहुँच छ । नत गास, बास र कपासको राम्रो व्यवस्था छ ? सदरमुकाम सिमकोटबाट आउदा जाँदा गरेर दुई दिन लाग्ने गर्दछ । यो समय भर सम्पर्क विहिन समेत हुनु पर्ने हुन्छ ।
उक्त क्षेत्रमा जानका लागि लिमिको तुलिङमा रहेको नदि आवत जावत गर्न सहज होस भन्ने उदेश्यले नाम्खा गाउँपालिकाको पहलमा उक्त हिमपाइप निर्माण गरिएको नाम्खा गाउँपालिका–६ लिमिका वडा अध्यक्ष पाल्जोर तामाङले बताउनुभयो ।
वडा अध्यक्ष तामाङका अनुसार विगत लामो समयदेखि लिमिका तीनवटा हल्जी, तिल र जाँग गाउँ र पर्यटकीय स्थल लाप्चा पुग्नलाई यातायातका साधनहरूलाई नदिमै वारपार गर्नु पर्ने बाध्यता थियो । जसले गर्दा यातायातका साधन र यात्रुले समेत कठिनाई भोग्नु पर्ने अवस्था थियो । तर अहिले नाम्खा गाउँपालिकाको पहलमा प्रदेस सरकारको २६ लाख रुपियाँमा उक्त हिमपाइप विछ्याइएको वडा अध्यक्ष तामाङले बताउनुभयो ।
यस अघि हिमपाइप नभएको समयमा केही गाडीहरू विचैमा फस्नु समेत परेको थियो । घटना ठूलो नभए पनि यहाँ पक्कि पुल नभएकै कारण हजारौँ पर्यटकहरूले कस्ट भोग्नु परेको थियो । उक्त समस्यालाई मध्य नजर राख्दै गाउँपालिकाले यतिवेला आठ वटा हिमपाइप जोडेर यातायातका साधन सहजै रुपमा गुड्न थालेका छन् ।
हिउँद वर्खाकै समयमा समस्या उत्पन्न नहोस् भन्दै उक्त तुलिङ खोलामा ति हिमपाइपहरू विछ्याउँदा हाल पुलका रुपमा काम भईरहेको अध्यक्ष तामाङको भनाई छ । वडा अध्यक्ष तामाङका अनुसार अझैँ उक्त हिमपाइप थप गर्नु पर्ने र वजेटको समेत माग गर्नु पर्ने भएको छ ।
विगत भन्दा यतिवेला हिमपाइप भएकै कारण आवतजावतमा सहज भएको छ । यो समय देश विदेशबाट हुम्ला हुँदै मानसरोवर दर्शन गर्ने पर्यटकहरूको संख्या वृद्धि भएको र उनिहरूका लागि सहज गर्ने उदेश्यले यो कार्यको थालनी गरिएको नाम्खा गाउँपालिका उपाध्यक्ष तक्दिर लामाले बताउनुभयो ।
बैशाखदेखि यता हालसम्म मात्रै हुम्लाको लिमि लाप्चाबाट दर्शन गर्ने पर्यटकहरूको संख्या ४ हजार १ सय भन्दा बढी पुगेको छ । पर्यटकको थप संख्या बढाउनलाई सल्ली लिमिलाप्चा सडक खण्डलाई थप प्रभावकारी बनाउनमा गाउँपालिका लागि परेको उपाध्यक्ष लामाले बताउनुभयो ।