हुम्ला । हुम्लालाई साक्षर जिल्ला घोषणा गरिएको छ । ‘साक्षरता हाम्रो गौरव, साक्षर जिल्ला हाम्रो उपब्धि’ नाराका साथ शुक्रबार एक कार्यक्रम गर्दै हुम्लालाई साक्षर जिल्ला घोषणा गरिएको हो । हुम्लामा १५ देखि ६० वर्ष उमेर समूहका नागरिकहरूको साक्षरता दर ९६ दशमलव ०.४ प्रतिशत मापदण्ड पूरा भएपछि हुम्लालाई साक्षर जिल्ला घोषणा गरिएको शिक्षा विकास तथा समन्वय इकाइ हुम्लाका कार्यालय प्रमुख योगेश आलेमगरले जानकारी दिनुभयो ।
हुम्ला नेपालको ६७ औं र कर्णाली प्रदेशको ८ औं साक्षर जिल्ला बनेको छ । १५–६० वर्ष उमेर समूहका ३५ हजार ३ सय ५४ जनामध्ये ३३ हजार ९ सय ५४ जना साक्षर भएको आलेमगरको भनाइ छ । हुम्लामा झण्डै १ हजार ४ सय नागरिक निरक्षर रहेका छन् । ताजाकोट गाउँपालिकामा ६६ जना, अदानचुलीमा १ सय ९२ जना, चंखेलीमा १ सय ९२ जना, सर्केगाडमा ३ सय १४ जना, खार्पुनाथमा १ सय ९४ जना, सिमकोटमा ३ सय ७१ जना र नाम्खा गाउँपालिकामा १ सय ११ जना गरि १ हजार ४ सय ४० जना अझै निरक्षर रहेको शिक्षा विकास तथा समन्वय इकाइ हुम्लाको तथ्यांक छ ।
कार्यक्रम निकै साँस्कृतिक तामझमका साथ सञ्चालन गरिएको छ । जिल्लालाई सक्षर घोषणा गरिए पनि दुरदराजका अधिकांस नागरिकहरू अझैँ औँठा छाप लगाउने भेटिएका छन् । जिल्ला समन्वय समिति प्रमुख शिवराज शर्माको अध्यक्षतामा उक्त कार्यक्रम सञ्चालन गरिएको हो ।