

हुम्ला । हुम्लाको सदरमुकाम सिमकोटको पर्यटकीय स्थलका रुपमा रहेको सिमसार क्षेत्रको सरसफाइ गरिएको छ । मङगलबार नेपाल विद्यार्थी संघ हुम्ला काठमाण्डौँ सम्पर्क समितिको आयोजनामा सिमसार क्षेत्रको सरसफाइ गरिएको हो । सदरमुकाम सिमकोटको मुटुका रुपमा रहेको पर्यटकीय स्थल सिमसार क्षेत्रको सरसफाई गरिएको नेपाल विद्यार्थी संघ हुम्ला काठमाण्डौँ सम्पर्क समितिका अध्यक्ष अंगबहादुर सिंहले बताउनुभयो ।
पछिल्लो समय हुम्लामा आन्तरिक तथा वाहिय पर्यटकको घुइचो हुने भएकाले पर्यटकीय स्थललाई स्वच्छ वातावरण बनाउने उदेश्यका साथ आफ्नो संगठनले यो अभियानको थालनि गरेको अध्यक्ष सिंहले बताउनुभयो । यो क्षेत्र पर्यटकहरू घुम्न गएपछि मनलाई सान्तोना गर्ने एउटा धार्मीक तथा पर्यटकीय स्थलका रुपमा चिनिदै आएको छ । सिमसार क्षेत्र सदरमुकाम सिमकोटको ५ नम्वर वडा भित्रै पर्दछ ।
उक्त स्थलमा फोहोर देखिएपछि यसको सुन्दरता नहराओस भन्दै मंगलबार विहानै उक्त संगठनको आयोजना र ४३ औँ वी.पी. स्मृति दिवसको अवसर पार्दै सरसफाई तथा सद्भाव कार्यक्रम सञ्चालन गरिएको हो । सरसफाइमा नागरिक समाज, जेष्ठ नागरिक, नेपाल पत्रकार महासंघ, जनप्रतिनिधिहरू लगायतका संघसंस्थाहरू जुटेका थिए ।
सदरमुकाम सिमकोटको नाम पनि यही सिमसारकै नामबाट जोडिएको छ । होचोमा “सिम” र अग्लोमा “कोट” भएकै कारण सदरमुकामलाई सिमकोट नाम रहेको पौरणिक कथन छ । यहाँ विभिन्न देशका पर्यटकहरू घुम्न र मनोरञ्जन गर्न आउने गर्दछन । उच्च हिमाली क्षेत्र रहेकोले हिउँदको समयमा चिसो र वर्षाको समयमा अति उत्तम हावा पानी हुने भएकाले पर्यटकहरूको लाम लाग्ने गर्दछ ।
जसका कारण सिमसार क्षेत्र जस्तो पर्यटकीय स्थललाई दुरगन्धित नहोस भन्ने उदेश्यले सरसफाई गरिएको छ । यसको संरक्षणका लागि विगत लामो समयदेखि यहाँका स्थानीयतहरूले घेरबारदेखि हरियाली बनाउने घाँस समेत रोप्ने कार्य भइ रहेको छ । यति मात्रै नभई बोटविरुवा रोप्ने र हरियाली बनाई हराबरा हुने गरेको छ ।